Skip to main content

Fjölgun á Skorrastað, óperugubb, Arnaldur Indriðason o.fl.

Nú er svo langt síðan ég hef bloggað að ég veit varla hvar ég á að byrja. Jæja…ég byrja bara einhversstaðar…..

---------------------------------------

Fjölgun stendur fyrir dyrum á Skorrastað 3. Nýtt kríli mun bætast í hóp vistmanna í aprílmánuði ef áætlanir standast. Meðganga gengur prýðilega og eiginkonan verður blómlegri með hverri vikunni. Tilhlökkun er mikil, enda eru börn dásamleg fyrirbæri. Fyrsta eintakið var sérlega vel heppnað og engin ástæða til að ætla að það næsta verði eitthvað síðra. Kyn hefur enn ekki fengið staðfest, en það mun þó gerast alveg á næstunni. Okkur er auðvitað nákvæmlega sama hvort það verður. Það verður elskað. Það er þó ljóst að það verður heilmikil breyting að fá alveg splunkunýja manneskju í hendurnar til að hugsa um. Frumburðurinn er að verða 10 ára og maður er auðvitað búinn að steingleyma því hvernig þetta smábarnastúss gengur fyrir sig. Við erum samt ótrúlega mikið betur í stakk búin til að takast á við þetta núna heldur en í fyrsta skiptið- búin að koma okkur ágætlega fyrir og búin með nám og það allt- a.m.k. í bili. Ég get ekki beðið eftir að kynnast þessari nýju himnasendingu. Ég gleymi aldrei augnablikinu þegar Sigga Thea var lögð í fangið á mér. Hún starði á mig stórum bláum augum og eignaðist hjarta mitt að eilífu.

-----------------------------------------

Fjölskyldan skellti sér til Prag í síðstu viku og eyddi 5 dögum í að skoða þá merku borg. Það verður sennilega ekki mikið um borgarferðir næstu misserin þannig að við ákváðum að kýla á eina slíka til að brjóta skammdegið upp. Ég er búinn að vinna mjög mikið upp á síðkastið og Jóna er búin að vera á kafi í löggildingarprófum, þannig að okkur fannst við eiga skilið að líta aðeins upp úr annríkinu, sinna hvert öðru og barninu, sem hefur verið full afskipt síðustu vikur og mánuði. Eitthvað hefur annríkið þó komið niður á heilsufarinu því okkur tókst öllum að fá einhverja fjandans ælupest í ferðinni. Ég held að maður sé orðinn eins og karfi. Maður þarf ákveðinn umhverfisþrýsting til að vera eðlilegur. Ef þrýstingurinn fellur byrja augun á manni að þrýstast út úr höfuðkúpunni og eitthvað gefur sig.

Fjörið byrjaði nóttina fyrir brottför, en Sigga greyið ældi alla nóttina. Svo ældi hún alla leiðina í flugvélinni. Næsti dagur var fínn, við skoðuðum borgina, fórum í dýragarðinn og höfðum það gott. Daginn eftir varð ég veikur. Slappaðist niður þegar leið á daginn. Um kvöldið áttum við miða í óperuna. Ég harkaði af mér, enda búið að greiða formúu fyrir miðana. Þurfti svo að hlaupa út af miðri sýningunni til að gubba. Var óheppilega staðsettur í húsinu og þurfti að æða inn á kvennasklósettið til að æla. Varð hugsanlega fyrsti karlmaðurinn í sögunni til að æla í kvennaklósettið í óperunni í Prag. Magnað. Næsta dag hélt ég að ég væri að deyja og þegar leið á daginn var Jóna orðin lasin líka. Hún jafnaði sig ekki áður en við fórum heim. Nánast alla ferðina var sem sagt einhver veikur. Það bjargaði málunum að við vorum á 5 stjörnu hóteli og því í sæmilegu yfirlæti. Ég get algerlega mælt með Prag. Fáránlega falleg borg sem hefur varðveist mjög vel. Við erum ákveðin í að fara þangað aftur.

Við komum til landsins á aðfaranótt föstudags og ætluðum svo að mæta á árshátíð KPMG á laugardaginn. Hættum hins vegar snarlega við það og brunuðum norður til Akureyrar og gistum tvær næstur á hótel mömmu til að ná heilsu. Á sunnudag fór ég á skauta í fyrsta skipti á æfinni. Það var hrikalega gaman. Ég datt ekki neitt og Sigga Thea brunaði um og var samt bara í sinni 3 skautaferð. Ég hugsa að við gerum það að reglu að kíkja á skauta. Skemmtilegt sport og að sumu leyti svipaður fílingur og að fara á skíði.

----------------------------------------------

Ég tók forskot á sæluna og skellti mér smá sundsprett í jólabókaflóðinu. Las Harðskafa eftir Arnald og Ösku eftir Yrsu. Arnaldur er orðinn hrikalega þéttur krimmahöfundur. Ég er ekki frá því að þetta sé hans næst besta bók á eftir Grafarþögn. Þarna er hann að leika sér með draugagang, spíritisma og fleira skemmtilegt. Mjög vel heppnað. Yrsa er líka ansi lunkin. Það er erfitt að láta Öskuna frá sér fyrr en maður er búinn með hana. Ég er annars búinn að liggja í krimmum upp á síðkastið- lesa Lisu Marklund, Stefán Mána og nokkra erlenda höfunda. Stórskemmtilegt. Ég er krimmafíkill held ég. Djöfull er Stefán Máni samt svartur. Mér leið illa eftir að hafa lesið “Svartur á leik”. Það vesta er að fróðir menn hafa sagt mér að margt af því sem er í bókinni komi beint úr íslenskum veruleika og sé bara ekkert ýkt. Og segi þá eins og Bjarni bróðir minn.

Crapenhagen.

Gott í bili.

Comments

Valdi said…
Ég er ánægður með þú skulir vera farinn að blogga aftur.
Steinunn Þóra said…
Gott að fá þig aftur í bloggheima. Til hamingju með hina væntanlegu fjölgun á fjölskyldunni. Það er gott að vita til þess að mannlífið verði blómlegt á Skorrastað næsta sumar. Fjölgun í sveitum landsins er nauðsynleg.
Siggi Óla said…
jamm....spurning um að redda þessum fólksfjöldamálum bara sjálfur. Mér er það ljúft og skylt!
Fjalar said…
Til hamingju öll með krílið, besta mál.
Salný said…
velkominn aftur, gaman af því og þetta byrjar vel.. kkv.
inga hanna said…
gaman að heyra að sé fjölgunarvon! til hamingju :)
kv. inga hanna

Popular posts from this blog

Rafmagnsbílar- ofurvélar

Var á leið í vinnu um daginn þegar ég heyrði viðtal við rafmagnsverkfræðing sem sagði illskiljanlegt af hverju ekki væri lögð meiri áhersla á framleiðslu og notkun rafmagnsbíla. Miklar framfarir hefðu orðið í framleiðlsu rafmótora og rafhlaðna og að í dag væru rafmagnsbílar fremri sprengimótorum að flestu, ef ekki öllu leyti.

Verandi forvitinn maður fór ég að rannsaka málið og datt niður á þessa síðu:

http://www.teslamotors.com/learn_more/faqs.php

Þetta er FAQ síða hjá fyrir tæki sem heitir Tesla Motors. Þeir framleiða rafmagnssportbíl (neibb....ekki oximoron!). Græjan er 4 sekúndur í hundraðið, kemst 400 km á hleðslunni og virðist vera ofursvöl græja. Og...hann kostar innan við 100.000 dollara. Strategían hjá þeim virðist vera að gera bílinn algengann hjá ríka fólkinu- fá umhverfismeðvitaða uppa til að skipta Porche-num út fyrir Teslu (Svona rafmagnsbíll myndi örugglega "get one laid" í henni Kaliforníu ,svo dæmi sé tekið). Afar snjallt.

Það sem ég er að velta fyrir mér er þet…

Menntakerfið byggir á úreltum og skaðlegum forsendum

Ákveðnar forsendur liggja til grundvallar í menntakerfinu okkar. Kerfið er í grófum dráttum svona:
Nemendum er skipt í hópa eftir aldri. Allir eru skulu dvelja á skólastofnun frá 6-16 ára. Þar skulu þeir læra samkvæmt gildandi aðalnámsskrá. Aðalnámsskráin er sett saman af sérfræðingum sem er gert að greina og ákveða hvað allir þurfa að læra svo að þeir séu tilbúnir í framhaldsnám og þátttöku í samfélaginu. Kennarar skulu svo gera sitt besta til að tryggja að allir nemendur tileinki sér sem mest af þeirri hæfni og þekkingu sem aðalnámsskráin segir til um. Það eiga sumsé allir að læra það sama. Frammistaða nemenda er vegin og metin frá upphafi með prófum og verkefnum sem eiga að segja til um hvernig þeim gengur.
Það er hægara sagt en gert að ná þeim markmiðum sem kerfið setur. Börnum er ekki eðlislægt að fylgja skipunum og sitja kyrr. Það þurfa þau samt að gera í skólanum, talsverðan hluta dags. Þau ráða engu um það hvað þau læra, hvenær, hvar, með hverjum eða hvernig (í flestum tilvik…

Lausn húsnæðisvandans: Lítil hús!

Mörg byggðarlög í landsbyggðunum eru í spennitreyju. Af ýmsum ástæðum er byggingarkostnaður þar hár (fjarlægð frá heildsölum í Reykjavík, skortur á iðnaðarmönnum o.fl.) og lágt fasteignaverð veldur því að útilokað er að selja eldri fasteign og kaupa sér nýja án þess að tapa á því stórfé. Sú eðlilega hringrás sem skapast þegar eldra fólk minnkar við sig til að fara í minna og hentugra húsnæði og rýmir þannig til fyrir barnafjölskyldum og yngra fólki er því rofin. Fólk fer beint út stóra húsinu sínu og á elliheimilið. Staðan er svo þannig í þeim landsbyggðum sem eru að vaxa (víðast vegna uppsveiflu í ferðaþjónustu) að stórvesen er að hýsa starfsfólk. Ungt fólk sem vill prófa að búa á þessum stöðum þarf annaðhvort að taka sénsinn á að kaupa sér einbýlishús sem það losnar svo tæpast við aftur, eða að leigja á háu verði, ef eitthvað leiguhúsnæði er þá í boði. 
Ég er með lausn á þessu. Hún er þessi:
Byggjum lítil og ódýr hús
Af hverju gerum við ráð fyrir að allir vilji búa í stóru húsi? Er…